Հարգելի ուսանողներ,
Շաբաթ օրը համալսարանի ռեկտորի հետ կայացած հանդիպման ընթացքում ներկայացվել են ուսանողությանը հուզող որոշ հարցեր` դրանց քննարկման նպատակով: Ստորև ներկայացնում եմ քննարկման արդյունքները կոնկրետ հարցերով:
Ուսանողների աշխատելու իրավունքը:
Նոր ընդունած որոշմամբ փաստորեն վերացվում է ընդհանուր կանոնը, ըստ որի գործատուի տեղեկանքը հանդիսանում էր բացակաները հարգելի համարելու հիմք:
Ռեկտորի պարզաբանմամբ այս որոշումը չի բացառում ուսանողների աշխատելու հնարավորությունը, և բացառիկ դեպքերում ուսանողները կարող են աշխատել համալսարանում սովորելուն զուգահեռ: Նման հնարավորության ընձեռման հիմք կարող են հանդիսանալ ուսումնական վարձը վճարելու նպատակով աշխատանքը և ուսանողի ընտանիքի սոցիալական պայմանների պատճառով աշխատանքի անհրաժեշտությունը: Ամեն դեպքում ուսանողը պետ է հիմնավորված դիմում ներկայացնի` նշելով առկա հանգամանքները:
Քննարկման արդյունքում որոշվեց, որ դիմումները կքննարկի և դրանց վերաբերյալ որոշում կկայացնի Ուսանողական խորհրդի և համալսարանի ղեկավարության ներկայացուցիչներից կազմված հանձնաժողովը:
Ռեկտորը հայտնեց նաև, որ բոլոր ուսանողները, ովքեր կցանկանան աշխատել սովորելուն զուգահեռ, ելնելով զուտ մասնագիտական հետաքրքրությունից, ունեն նման հնարավորություն, սակայն այս դեպքում այդ աշխատանքը պետք է հնարավորինս չխանգարի դասերին, այսինքն ուսումը պետք է լինի գերակա, ինչն ըստ համալսարանի ղեկավարության բնական է:
Նշվեց նաև, որ յուրաքանչյուր դեպքում ուսանողի աշխատանքային գործունեությունը պետք է համաձայնեցվի եռակողմ կարգով (ուսանողի, գործատուի և համալսարանի միջև):
Անկախ ամեն ինչից խնդրում եմ համալսարանի կողմից մերժում ստացած ուսանողներին դիմել մեր էլեկտրոնային հասցեով, մանրամասն ներկայացնելով իրենց խնդրանքի և համալսարանի մերժման հիմնավորումները:
Կարգապահական տույժերի վերաբերյալ նոր որոշում
Քննարկումների արդյունքում որոշվեց վերաձևակերպել տվյալ որոշումը` ելնելով ուսանողների կողմից դրա արդարացի տարըմբռնման փաստից: Խնդիրը կայանում է նրանում, որ չնայած ըստ ղեկավարության այս նոր որոշումն ավելի մեղմ է, դրա ընթերցանության արդյունքում այն թվում է ավելի խստացնող:
Իրականում այս նոր որոշումը մասնակիորեն մեղմացնում է գործող կարգը, և եթե նախկինում կարգապահական տույժը տարին տարվա վրա իջնում էր մի աստիճանով, ապա նոր կարգով ամեն նոր ուսումնական տարին ուսանողը սկսում է առանց տույժերի:
Օրինակ` եթե ուսանողը բազմաթիվ բացակաների պատճառով ունի կարգապահական տույժ զեղչված տեղերից զրկված լինելու տեսքով, ապա նախկին կարգով հաջորդ տարում ունենում եր մեկ աստիճան ցածր տույժ և եթե ստանար նախազգուշացում ապա նորից կզրկվեր զեղչված տեղի իրավունքից: Նոր կարգով տարին տարվա վրա տույժերի գումարում չի լինելու, իսկ նախկինում ստացած տույժերը գրանցվելու են ուսանողների գործերում հետագայում անհրաժեշտության դեպքում ուսանողների միջև որպես համեմատական գործակից օգտագործելու նպատակով:
Իսկ ինչ վերաբերում է քննական խախտումներին, ապա այստեղ ինչպես նախկինում` քննական խախտում կատարած ուսանողը զրկվում է զեղչված տեղի իրավունքից միայն հաջորդ տարվա համար, և մեկ տարի անց կարող է վերականգնել այն:
Ռեկտորը նշեց, որ իսկապես հրամանի տեքստը տարընթերցումների տեղիք է տվել և այն պետք է վերանայվի:
Բաց թողնված դասաժամերի լրացումը
Քննարկման արդյունքում պարզաբանվեց, որ այս նոր կարգը, որը այլևս չի նախատեսում բաց թողնված դասաժամերի լրացում, ուղղված է ոչ թե ուսանողների դասաժամերը քչացնելուն, այլ դասախոսներին պարտաճանաչության մղելուն: Ռեկտորը վստահություն հայտնեց, որ մոտ ապագայում այս նոր կարգը կտա իր պտուղները և դասախոսի չներկայանալու դեպքում վերջինս պարտավոր է լինելու ներկայացնել փոխարինողի: Ռեկտորը հայտնեց նաև, որ իր ցանկությունն է, որպեսզի բոլոր դասերը կայանան նախօրոք հայտարարված ժամին և չթողնվեն քննություններին պատրաստվելու վերջին շաբաթվա վրա:
Իմ անունից նշեմ, որ կոնկրետ այս մի հարցում լիովին կողմ եմ նշված փոփոխությանը, ուղղակի մի որոշ ժամանակ պետք է սպասել, որպեսզի դասախոսները դառնան ավելի պարտաճանաչ, իսկ անպարտաճանաչները փոխարինվեն: Գլխավորն այն է, որ այլևս դասախոսները չեն կարողանա պարբերականորեն բացակայելու պարագայում, բաց թողնված ժամերը լրացնել քննություններին նախորդող ազատ շաբաթվա ընթացքում, ինչը միանշանակորեն բխում է մեր շահերից:
Բացի այդ, կոչ եմ անում բոլոր կուրսերի ավագներին պահել դասախոսների դասամատյան և այնտեղ գրանցել վերջիններիս բացակայությունները կամ ուշացումները: Այդ դասամատյանները ամեն կիսամյակ կտրամադրվեն մեզ` հրապարակվելու նպատակով: Կարծում եմ` դա կօգնի դասախոսներին դեպի պարտաճանաչություն տանող դժվարին ճանապարհին: Ամեն դեպքում ես սպասելու եմ այդ մատյաններին այս դեկտեմբերի վերջ:
Պետական քննություններ
Նախորդ տարիների նախաքննական անորոշությունը այս տարի մեզ դրդեց հնարավորինս շուտ բարձրացնել տվյալ հարցը: Առաջարկ է արվել հնարավորինս շուտ ուսանողներին տեղեկացնել պետական քննությունների հետ կապված ողջ ինֆորմացիան (առարկաները, ընթացակարգը և այլն), որպեսզի ուսանողները հոգեպես պատրաստ լինեն և անակնկալի չգան կարևորագույն քննություններից առաջ:
Ռեկտորը խոստացավ, որ կդիմի ամբիոնի վարիչներին ֆակուլտետների դեկանների հետ խորհրդակցելու պահանջով և այնուհետև վերջնական որոշված տարբերակները շատ մոտ ապագայում կքննարկվեն և կհաստատվեն Գիտամանկավարժական խորհրդի կողմից:
Հուսով եմ` մինչև այս կիսամյակի ավարտ 4-րդ և 6-րդ կուրսերի ուսանողները կիմանան, թե ինչ է իրենց սպասում պետական քննություններին:
...
Վերջում ուզում եմ նշել, որ վերոնշյալ քննարկումները և տվյալ նամակն ունեն զուտ ինֆորմատիվ բնույթ, և ուսանողները այնուամենայնիվ կարող են իրենց բողոքն արտահայտել դրա համար գոյություն ունեցող ցանկացած քաղաքակիրթ միջոցով (ստորագրահավաք, դիմում-բողոք համալսարանին, դիմում ՈւԽ-ին և այլն):
Եղեք զգոն, պարտաճանաչ և ճանաչեք Ձեր իրավունքները,
Հարգանքով`
ՀՖՀՀ Ուսանողական Խորհուրդ
Posts
.gif)
